Punjab Green Tractor Scheme ne ek dafa phir se kisano ke liye aik zabardast khushkhabri ka elan kiya hai. Green Tractor Scheme ka doosra marhala jald shuru kiya ja raha hai. Pehle phase mein 9500 khush-naseeb kisano ko tractor kharidne par subsidy di gayi thi. Ab doosre phase mein yeh taadaad barhakar 20,000 tractors tak le jayi ja rahi hai. Agar aap bhi Punjab ke rehne wale hain aur is scheme ka intezar kar rahe thay, to ab aapka intezar khatam hone wala hai.
Is article mein aapko mukammal tafseelat di jayengi ke registration kab shuru hogi, kaun kaun is se faida utha sakta hai, aur kis tarah aap apply kar sakte hain.
Green Tractor Scheme Kya Hai?
Green Tractor Scheme ek khas muhim hai jo Punjab Hakoomat ne chhote kisano ki madad ke liye shuru ki. Is scheme ka maqsad yeh hai ke tractors aur zarai machinery kisano ko kam qeemat mein faraham ki jaye, taa ke wo apni paidawaar mein izafa kar saken. Subsidy ki madad se kisan asaani se modern aur fuel-efficient tractors hasil kar saken ge.
Yeh sirf kisano ke liye hi faida mand nahi, balkay poori economy ke liye bhi behtari ka zariya banayga.
Doosray Phase Ki Shuruaat Kab Hogi?
Filhal, Punjab Agriculture Department ne official taur par registration ki tareekh ka elan nahi kiya. Lekin kuch dino pehle unke social media account par kaha gaya tha ke registration jald hi shuru hone wali hai. Jaise hi registration ka proper elan hoga, aapko foran mutaliq kiya jaye ga.
Scheme Ki Khas Khas Baten:
-
Subsidy Ka Faida: Har kamyab applicant ko tractor kharidne par hakoomat ki taraf se khas subsidy milegi.
-
Modern Tractors: Scheme ke zariye latest model tractors faraham kiye jayenge jo fuel-efficient aur powerful honge.
-
Transparent Qurandazi (Lottery) System: Selection ka tareeqa mukammal shaffaf hai, jahan sab kisano ko barabar ka moka milta hai.
-
Small Farmers Ki Madad: Scheme ka asli maqsad chhote kisano ko zarai alat faraham karna hai taa ke wo apni paidawari salahiyat barha saken.
-
Limited Tractors: Sirf wohi kisaan faida utha saken ge jo eligibility criteria ko pura karte hain.
-
Asaan Registration: Online aur tehsil level par registration ki sahulat di ja rahi hai.
Eligibility Criteria
Agar aap is scheme ka hissa banna chahte hain, to neeche diye gaye sharaait ko pura karna zaroori hai:
-
Applicant sirf Punjab ka rehaishi hona chahiye.
-
Sirf woh kisaan eligible hain jinke paas 1 se 50 acre zameen ho.
-
Pehle phase mein tractor hasil karne wale dobara apply nahi kar sakte.
-
Land record Punjab Land Record Center mein mojood hona chahiye.
-
Kisaan kisi illegal activity mein mulawis nahi hona chahiye.
-
Applicant ke paas valid Kisan Card hona chahiye.
-
NSER Survey mukammal hona chahiye.
-
Kisi bank ya financial institution ka defaulter nahi hona chahiye.
-
CNIC par permanent Punjab address hona chahiye.
Apply Karne Ka Tareeqa:
Jab doosre phase ka registration officially shuru hoga, to do tareeqon se aap apply kar sakenge:
-
Online Application: Ghar baithay official website par jaakar registration ki ja sakti hai – agripunjab.gov.pk
-
Zila Office Say Registration: Har district mein Deputy Director Agriculture Extension ke office mein jaakar bhi aap registration karwa sakte hain.
Raabta Aur Maloomat Ke Liye:
Agar aapko scheme ke mutaliq mazeed maloomat chahiye to:
-
Website visit karein: www.agripunjab.gov.pk
-
Call karein: 0800-17000 (Monday to Saturday, 8am se 8pm tak)
Aakhri Batain:
Green Tractor Scheme ka dusra phase kisano ke liye ek aur behtareen moka hai. Pehle phase ki kamyabi ke baad, dusre phase mein hakoomat ne tractors ki taadaad bhi barhadi hai. Agar aap eligible hain to zaroor tayyari rakhein, registration jald hi shuru hone wali hai.
Agar aapko mazeed sawalat ya madad chahiye to niche comment karein, hum aapko mukammal rehnumai faraham karein ge.